தமிழக அரசியல் வரலாறில் கடந்த 50 ஆண்டுகளுக்கும் மேலாக கோலோச்சிய திராவிட கட்சிகளை தனது 2 வருட அரசியல் வருகையால் திணறடித்து நடிகர் விஜயின் தமிழக வெற்றிக் கழகம் வரலாற்று சாதனை படைத்து வாகை சூடியுள்ளது.
விஜயின் அரசியல் வருகை தமிழக அரசியலில் இரு திராவிட கட்சிகளுக்கும் கடும் போட்டியாக அமைந்தது.
விஜயின் நிகழ்ச்சிகளுக்கு வந்த மக்கள் கூட்டம் தமிழகத்தை மட்டுமின்றி இந்தியாவையே அதிரச் செய்த நிலையில், நடந்து முடிந்த தமிழக சட்டப்பேரவைத் தேர்தலில் தவெக 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ளது.
இருப்பினும், தவெகவுக்கு அறுதி பெரும்பான்மை கிடைக்காததால், தொங்கு சட்டப்பேரவை அமையும் நிலை ஏற்பட்டுள்ளது. இதையடுத்து தவெக தரப்பில் இருந்து திமுக கூட்டணியில் இடம் பெற்ற காங்கிரஸ், விசிக, கம்யூனிஸ்ட் கட்சிகளுக்கு ஆதரவு கோரி கடிதம் அனுப்பப்பட்டது.
இந்நிலையில், தமிழகத்தில் தவெக ஆட்சி அமைக்க காங்கிரஸ் கட்சி நிபந்தனையுடன் ஆதரவளிக்க முன் வந்திருப்பதாக அக்கட்சி அறிவித்துள்ளது.
இதுகுறித்து காங்கிரஸ் வெளியிட்டுள்ள அறிவிப்பில் கூறப்பட்டுள்ளதாவது:
தமிழக வெற்றிக் கழகத்தின் (TVK) தலைவர் விஜய் தமிழ்நாட்டில் ஆட்சி அமைப்பதற்கு ஆதரவு அளிக்குமாறு இந்திய தேசிய காங்கிரஸிடம் (INC) அதிகாரப்பூர்வமாகக் கோரிக்கை விடுத்துள்ளார்.
தமிழ்நாட்டு மக்கள், குறிப்பாக இளைஞர்கள், அரசியலமைப்பு கோட்பாடுகளில் நம்பிக்கையுள்ள ஒரு மதச்சார்பற்ற, முற்போக்கான மற்றும் மக்கள் நல அரசு அமைய வேண்டும் என்பதற்காக மிகவும் தெளிவான, வலுவான மற்றும் அமோகமான தீர்ப்பை வழங்கியுள்ளனர். அடுத்த அரசாங்கத்தை அமைப்பதற்கு விஜய் தலைமையிலான தமிழக வெற்றிக் கழகத்தை மக்கள் தேர்ந்தெடுத்துள்ளனர்.
இந்திய தேசிய காங்கிரஸ், இந்தியாவின் மதச்சார்பற்ற, முற்போக்கான மற்றும் மக்கள் நல அரசியலின் அடையாளமாகவும், அதன் தோற்றுவிப்பாளராகவும் திகழ்கிறது. தமிழ்நாட்டு மக்களின் இந்த ஆணையை மதிப்பதும், நிலைநிறுத்துவதும், அதனை நிறைவேற்ற உதவுவதும் எங்களது அரசியலமைப்பு ரீதியான கடமையாகும்.
அதற்கேற்ப, தமிழக வெற்றிக் கழகம் ஆட்சி அமைக்க தனது முழு ஆதரவை வழங்க தமிழ்நாடு காங்கிரஸ் கமிட்டியும், காங்கிரஸ் சட்டமன்றக் கட்சியும் (CLP) முடிவு செய்துள்ளன.
இந்திய அரசியலமைப்பில் நம்பிக்கையற்ற எந்தவொரு வகுப்புவாத சக்திகளையும் இந்த கூட்டணியில் சேர்க்கக் கூடாது என்ற நிபந்தனையின் அடிப்படையில் எங்களது ஆதரவு அமையும்.
தமிழக வெற்றிக் கழகம் மற்றும் தமிழ்நாடு காங்கிரஸ் இடையிலான இந்த கூட்டணி, தந்தை பெரியாரின் சமூக நீதிச் சிந்தனைகள் மற்றும் டாக்டர் பி.ஆர். அம்பேத்கரின் அரசியலமைப்புச் சட்டக் கோட்பாடுகளுக்கு வலுவான அர்ப்பணிப்புடன், பெருந்தலைவர் காமராஜரின் பொற்கால ஆட்சியை மீண்டும் தமிழ்நாட்டிற்கு கொண்டு வர பாடுபடும்.
பரஸ்பர மரியாதை, தகுந்த பங்கு மற்றும் பகிர்ந்தளிக்கப்பட்ட பொறுப்பு ஆகியவற்றின் அடிப்படையில் உருவான இந்த கூட்டணி, தற்போதைய ஆட்சி அமைப்பதோடு மட்டுமல்லாமல், எதிர்காலத்தில் நடைபெறவிருக்கும் உள்ளாட்சித் தேர்தல்கள், மக்களவை மற்றும் மாநிலங்களவைத் தேர்தல்களுக்கும் தொடரும்.
விஜய் மற்றும் ராகுல் காந்தி ஆகியோர் இணைந்து, மதச்சார்பற்ற மற்றும் முற்போக்கான அரசாங்கத்திற்கான தமிழ்நாட்டு மக்களின் இந்த வரலாற்றுச் சிறப்புமிக்க தீர்ப்பை மதித்து நடப்பதாகவும், தமிழ்நாட்டு மக்களின், குறிப்பாக இளைஞர்களின் கனவுகளையும் வாக்குறுதிகளையும் நிறைவேற்றுவதாகவும் உறுதிபூணுகின்றனர்.
இவ்வாறு அந்த அறிவிப்பில் தெரிவிக்கப்பட்டுள்ளது.
